DE CHUID

One of (a number) an chiall atá le ‘de chuid’ agus níor cheart é a úsáid ag tagairt do rud uathúil. Féach, mar shampla: Is é an tUasal Micheál Martin, T.D. an ceannaire nua de chuid Fhianna Fáil. Ar ndoigh, níl ach ceannaire amháin ar an pháirtí: Is é an tUasal Micheál Martin, T.D. ceannaire nua Fhianna Fáil.

Ní bheadh aon locht ar ‘Seanadóir de chuid Shinn Féin’ (mar tá níos mó ná duine amháin acu ann) nó ‘foilseachán de chuid Pháirtí an Lucht Oibre.’

Is minic a bhaintear úsáid as 'de chuid' chun saothar a chur i leith údar: An cúigiú siansa de chuid Beethoven. Ní oireann sé gach áit a bhfuil ofby sa Bhéarla:

  • Léiriú de chuid Waiting for Godot de chuid Beckett.

Tá an chéad 'de chuid' mícheart mar go dtugann sé le fios gur saothar le neach éigin darb ainm Waiting for Godot atá sa léiriú seo. (Dá mbeadh compántas drámaíochta ann agus an t-ainm sin orthu, ní bheadh locht ar bith air.) Tá an dara 'de chuid' mícheart mar tugann sé le fios go bhfuil rud éigin ar an saol ar a dtugtar Waiting for Godot agus gurb é seo sciar Beckett de. Is furasta é a chur ina cheart:

  • Léiriú de Waiting for Godot, le Beckett.
  • Léiriú de Waiting for Godot, dráma de chuid Beckett.